اهلا بيك مرة تانية وكل عام وانت بخير بمناسبة دخول شهر رمضان المبارك ..
هل لسا متحمس تشق طريقة للوصول لفرصة احلامك؟ وخلاص قررت انك تلتزم بالخطوات اللي قولتلهالك في الحلقة اللي فاتت وتنويه اللي لسا مسمعش الحلقة السابقة لازم يسمعها علشان يفهم رايحين علي فين ..
وهنجاوب عن السؤال الأزلي هل البيضة جات الاول ولا الفرخة لا لا قصدي هل الخبرة تيجي الاول ولا الفرصة؟ ا
زاي تقدم للوظائف أو تدريبات وهما طالبين يكون عندك معرفة بحاجات معينة في سوق العمل وانت مفيش خبرة خالص مشتغلتش ولا خدت تدريب.
طب انت عارف ليه اصلا الشركات بتحط الشروط دي للفرص ماهو تدريب للطلاب لسا هيتعلم فيه .. ليه الطالب يكون عنده معرفة في المجال اللي هيتدرب فيه ماهو لسا بيدرس اساسا
ولا ليه بردو حاطين شروط لحديثي التخرج اللي لسا مش عارفين سوق العمل شكله ازاي ولا المجال اللي درسوه لمدة 4 5 سنين بيتطبق ازاي علي هيئة شغل
ولا ليه كمان بيطلبوا من حديث التخرج في اول وظيفة له انه يكون عارف عن مجاله كويس ويتسأل عنه في الانترفيو وكمان يكون بيعرف يستخدم ادوات وSoft wares وغيرها وكمان الناس اللي فمجال البرمجة تكون اشتغلت علي مشاريع وعملت حاجة فعلية
طبعا كل دا لسبب واحد رئيسي وهو ان الطلب اكبر من العرض
عدد الفرص اقل بكتير من عدد المتقدمين فاكيد هيكون في فلترة واختيار للافضل .. فهيخدوا واحد يتعبوا في تعليمه اقل من واحد تاني لسا ميعرفش حاجة منطقي صح
طيب وبعدين ايه الحل هل نسافر ونروح دولة تانية؟ … احب اقولك ان المنافسة دي في معظم دول العالم ومفيش مكان هيبقي اسهل بكتير من التاني وبالعكس قد تكون المنافسة اصعب برا دولتك لان مستوي التعليم مختلفة والجامعات برا متعاقدة مع شركات بتوفرلك تدريب علشان يزود كفاءة الطالب فدا مش الحل ولكن لو في فرصة سفر مضمونة سافر انصحك يعني
المهم هل فيه حل؟
اكيد في حل امال ازاي الناس اللي بتدريب وبتتوظف من دولة تانية .. فتعالي اقولك كام حاجة تساعدك علي المنافسة الشرسة دي وتميزك عن الباقي:
1- التعليم education
التعليم بتاعك يامعلم او حاجة بتكتبها في السي في بعد معلومات التواصل وال Summary أو الObjective وفي الغالب دي اول حاجة بيبص عليها الاتش ار علشان يعرف انت طالب في سنة كام لو مقدم علي تدريب او اتخرجت امته لو حديث تخرج فخلي بالك …
– دراستك في جامعات محُترمة ذات جودة هيقويك في مجالك وهيديك ميزة نسبية عن أي حد وكمان الجامعات الكويسة بتوفر كورسات وتدريبات بالشراكة مع مؤسسات وشركات هتسهلك تحصل علي الفرصة وكمان بتعمل كل فترة ملتقي توظيف خاصة بالدارسين بالجامعة دي
فطبعا الجامعات الدولية وتحتها الخاصة وهكذا حتي الجامعات الحكومية فئات والمفروض تختار الجامعة الاقوي زي جامعة القاهرة وعين شمس كمثال
طيب افرض الظروف حطيتك في جامعة حكومية عادية جدا او خلاص فات الوقت اني اختار جامعة كويسه او اخترت تخصص ملوش فرص كتير في السوق اعمل ايه؟ تعالي نخش علي تاني حاجة وهي
2- التدريبات أو الinternships
ولو متعرفش يعني ايه تدريب هي جاية من كلمة intern ودا معناه انك بشتغل ولكن لمدة صغيره من شهر لتلات شهور ودا بيكون اكتر للطلاب في فترة الاجازة الصيفية وممكن يكون نفس المدة او اطول توصل ل 6 شهور او سنة او حتي سنتين لحديثي التخرج
وبيكون اكتر من شكل علي حسب كل شركة
وممكن يكون في برنامج تدريبي ومحاضرات مع جزء عملي او ممكن يكون كله عملي بتنزل في مكتب المحاسبة او المحاماة أو فرع أو المكتب الرئيسي للشركة او في المصنع او في موقع زي المهندسين او في فرع البنك وهكذا
وبتشتغل زي الموظف بالظبط بس طبعا بيكون مهامك صغيره او بيكون تحت اشراف الموظف او حد متخصص ودا طبعا الافضل لانك بتاخد خبرة عملية اكتر
– فلازم تسعي إنك تدور علي شركات تتدرب فيها في مجالك، لأن ده هيديك خبرة، وهيقربك أكتر من الواقع العملي، وهتقدر تبني علاقات مهنية هتساعدك بعد كده جدا دا غير انها اضافة للcv كويسه بالذات لو من مكان كبير او معروف.
– التدريب كمان هيفتحلك فرص كتير بالأخص في الشركة اللي إتدربت فيها.
لان في معلومة خطيرة جدا هتغير فكرتك عن التقديم علي الفرص اونلاين
ان الفرص اللي بتشوفها اونلاين كلها علي كل المواقع هي مجرد 40% من الفرص اللي بتكون موجودة فعليا لان معظم الشركات بتفتح الفرص دي للناس اللي جوا الشركة نفسهم او المعارف والمقربين بين قوسين (الوسطة) وهنتكلم عن الموضوع دا بشكل اعمق في حلقة تانية وهعرف ازاي يبقي عندك واسطة.
وبعد كدة
3- الخبرة التطوعية:
– هتكسبك مهارات كتيرة جدا ، ده غير إن الشركات دلوقتي بتعتبر الخبرة التطوعية – سواء في منظمات خيرية أو مجتمعية أو أنشطة طلابية – شىء أساسى لقبول أى حد عندها … فيا بقي لو لقيت تطوع في مجالك او تخصصك او حتي قريب منه فكدة ضربت عصفورين بحجر وده هيساعدك تطبق اللي إتعلمته أكتر والشطارة هنا إنك تقدر تعرضها وتتكلم عنها بشكل جيد فى الـ Interview كجزء مهم من خبراتك.
وجدير بالذكر هنا اني بتكلم عن الخبرة التطوعية مع المؤسسات الخيرية والاجتماعيلية وليس الانشطة الطلابية لان معظم الانشطة الطلابية مش بتبقي مفيدة وبيقي مجرد خدمة لكيان معين اكيد بتستفاد ولكن بتبذل وقت ومجهود كبيرة علشان تطلع في السلم الوظيفي بتاعهم تبقي تيم ليدر وهيد والكلام دا ولو انت معندكش وقت كفاية دا هيأثر علي دراستك وبالتالي هيبقي مضر اكتر ماهو مفيد واكيد في اماكن كويسه وبتستفاد منها وبتكتسب مهارات زي التواصل والعمل الجماعي وغيرها ودا مجرد رأي
4- المهارات ال skills
ودي بتنقسم لكذا حاجة وهي المهارات الفنية ال technical skills زي مايكروسوفت اوفيس ودا شئ اساسي دلوقتي لكل التخصصات
وبردو التعامل مع الكمبيوتر المفروض تبقي عارف الحاجات دي بديهيا حتي منغير ما تكتبها في الcv فطبعا لو عندك كمبيوتر اول لابتوب فلازم تعرف انك تشتغل عليه وبالنسبة للمايكروسوفت فاستغل اي حاجة تتطلب منك في الجامعة سواء اساينمت او بحث او غيره انك تعمله علي الكمبيوتر دا بالتالي هيعلمك اكتر وطبعا مشروع التخرج بدل ما بتدفع فلوس وحد يعملهولك جرب اعمله بنفسك
وبردو البرامج المحاسبية لو انت محاسب والبرامج الهندسية لو انت مهندس وهكذا لكل مجال له البرامج بتاعته لازم تبقي علي دراية بيها وهقولك ازاي
وبعدين المهارات الحياتية او soft skills زي التواصل والعمل ضمن فريق وغيرها
ومهارات اللغة طبعا كلنا عارفينها لو الانجليزي مثلا فلازم يكون عند مهارات الكتابة والتحدث والقراءة والاستماع
ودي المفروض انك بتكتسبها من التدريب او الوظيفة او التطوع وكمان تقدر تكتسبها من كورس
وحاجة مهمة جد الاسكيلز دي مش افضل حاجة انك تكتبها كلها تحت بعضها في الcv ومهم جدا تتذكر وسط سياق الخبرات والتدريبات وبإذن الله هنوضح الموضوع دا اكتر في كورس الcv عما قريب
5- الكورسات الCourses
وبعد كدة نيجي للكورسات هل فعلا الكورسات الاونلاين المجانية دي هتديني خبرة ومهاارات
طبعا بلا شك سواء كورس اونلاين او كورس اوفلاين في مكان هتستفيد منه وكمان لو موقع مشهور هتاخد شهادة زي كورسيرا او إدراك وغيرها من المواقع وتقدر تحطها علي لينكيدإن توثق بيها بس انك خدت المحتوي دا وهنتكلم اكتر في حلقة كاملة عن الكورسات واهميتها
وبالمناسبة اهتم اكتر بالمحتوي والتطبيق وليس الشهادة وعادي جدا تاخد كورس علي يوتيوب وتكتبه في الcv لغاية ما تاخد حاجة افضل في نفس المجال وتحطها بدالها وهكذا.
6- إحتك بناس محترفين Professionals في مجالك:
– الإحتكاك بالناس المحترفة في مجالك هيوفر عليك وقت ومجهود كبير وهيزودوك بالدعم بإستمرار.
فزي مانت بتدخل الكلية وبتسأل الطلبة اللي اكبر منك في الجامعة فلازم تسأل الخبراء او الناس اللي ابتدت في المجال قبلك
– أهم حاجة دور على الناس اللى في نفس مجالك، علشان تقدر تستفيد من خبراتهم، وتعرف منهم إيه المهارات اللى عايزها المجال ده منك، وإيه الحاجات اللى لازم تتوافر فيك وتتعلمها.
– إسمع منهم تجاربهم في مجال الشغل، وإسألهم عن الحاجات اللي معندكش علم بيها، وحاول تعرف منهم إيه المشاكل اللي واجهتهم، وإزاي قدروا يعدوها.
والأهم إنك تحافظ على تواصولك معاهم بإستمرار بطريقة ذكية، علشان تقدر تحصل علي أكبر إستفادة منهم وفى نفس الوقت متضيعش وقتهم.
طبعا الكلام دا ممكن تعمله في الحياة الواقعية او اونلاين علي لينكيدإن
7- إستفيد من شبكة علاقاتك Network
– فزي ماقولتلك ان معظم الفرص بتنزل في الشركة داخليا فلازم تكون علي تواصل بالHRs مسؤولي التويظف في الشركات اللي فمجالك وليكن البنوك وتبدأ تسال الHR اللي بينزل التدريبات أو الوظائف علي لينكيدإن عن تدريب صيفي مثلا او تدريب خريجين هيبدأ امته وتاخد منه معاد تسأله تاني وهكذا
وهنوضح ازاي توصل للHRs من خلال لينيكدإن وتقدر تبعتلهم رسالة في كورس لينكيدإن بإذن الله ..
علشان كدة كل ما الـ Network بتاعتك زادت فى مجالك، كل ما معرفتك فى مجالك بتزيد، وعلاقاتك دى هتوصلك للفرص بدون مجهود وهتساعد كتير في تعيينك.
8- إبني Brand قوي لنفسك
– مواقع التواصل النهاردة زي Facebook مع اني مبحبوش ولكن عليه ناس كتير وLinkedIn والجروبات اللي بتنزل تدريبات ووظائف زي جروباتنا
بقوا زى معرض للمواهب والإمكانيات! فحاول على قد ما تقدر تستفيد من المواقع دى، في إنك تظهر نفسك من خلالها، وتعرض مواهبك، وكل الحاجات اللي إتعلمتها، وكل الإنجازات اللي قدرت تحققها، وشاركها مع الناس أول بأول.
– وأفتكر دايما إن كل حرف بتقوله وكل صورة بتشيرها هى بمثابة إعلان عن نفسك، فخلى بالك من ده، وصدر أحسن “نسخة حقيقية” منك!
9- أختار الوظيفة اللى تناسب إمكانياتك ومؤهلاتك وخبراتك وقدم عليها
– بلاش تقدم على كل حاجة وأى حاجة .. صدقنى مش صح! الطريقة دى هتسبب لك إحباط، لإنك بتقدم على حاجات كتير ومافيش حاجة بتيجى، مع إنك أصلا أنت بتقدم غلط!
– فى كل وظيفة عايز تقدم عليها، هتلاقي Description وصف تكونة من متطلبات Requirements ومؤهلات Qualificationsوممكن تلاقي مهارات Skillsللفرصة دي، بتوضح الخبرات والمهام اللي مُفترض هيعينوك بناءا عليها،
بص عليها كويس قبل ما تقدم عليها، وبعدين ييجى دورك وإنت بتبعت الـCV بتاعتك إنك تحاول تبين قد إيه إنك بتعرف تعمل المهام دي،
وتعمل Focus تركيز عليها، ثم تحاول بقي تقنعهم وأنت فى ال Interview إنك الشخص المثالي للفرصة دي.
ودا لا يمنع انك تكون متابع يوميا منصات التوظيف والتدريب زي لينكيدإن ووظف وفرصنا وغيرهم كتير وتعمل فيها كلها job alert تنبيه بالوظايف او التدريبات بال key wordالكلمة المفتاحية المناسبة
وطبعا منصتنا إيجينكس دوت كوم بصراحة بنعمل عليها مجهود جبار اننا بندور علي كل المنصات التانية وبنوفر تجميعة كويسة وموثقة من الفرص تنفع لكل التخصصات وتكون مناسبة اكتر للطلاب وحديثي التخرج وكمان بنزل الفرص دي علي جروبات في معظم منصات التواصل الاجتماعي وكمان بنعمل شروحات للتقديم علي الفرص دي علي يوتيوب فاظن ان ملكش حجة الفرص متوفرة وطريقة التقديم موجودة … استعن بالله وتوكل ومتنظرش رد من حد انت اعمل اللي عليك وسيب الباقي علي ربنا وإن اجتهد ربنا هيكرمك بإذن الله
طب انا لسا متخرج ومش عارف حاسس ليه بإحباط ومعنديش طاقة اني اعمل حاجة عارف ازاي اطور نفسي وعارف ازاي اقدم بس مش قادر
بإذن الله هنتكلم الحلقة الجاية عن الموضوع المهم جدا جدا دا وهو اكتئاب ما بعد التخرج واللي حاليا بمر بيه ومعظم الخريجين الجدد بيمروا بيه فتعالي نشوف ازاي نحاول نقلل حدته و نطلع منه في الحلقة الجاية
وبس كدة
شكرا لاستماعكم واتمني تكونوا استفادتكم واستنونا في الاسبوع الجاي يوم الجمعة في تمام ال10 مساءا
